Isang pag-aaral ng Nueva Vizcaya State University (NVSU) ang matagumpay na nakagawa ng isang ‘biofungicide’ mula sa entomopathogenic fungi (EPF) laban sa tomato black leaf mold (TBLM). Ang ‘biological agent’ na ito ay matagumpay na nasubukan sa mga taniman ng kamatis.
Ito ay naisagawa sa ilalim ng proyektong, “Development of Formulated Entomopathogenic Fungi (EPF) as Biofungicide against Tomato Black Leaf” na pinangunahan ni Dr. Jonar I. Yago, NVSU Vice President for Research, Extension, and Training.
Ang TBLM ay sanhi ng ‘fungus’ na Pseudocercospora fuligena na nagdudulot ng pagkalat ng ‘brown mold’ sa ibabaw ng dahon ng halaman. Ang malalang impeksyon ng TBLM ay nagdudulot ng malalang pinsala sa mga dahon, mas mababang kalidad ng kamatis, at mas mababang ani.
Sinubukan ang biofungicide sa Kasibu, Nueva Vizcaya kung saan naitalang umaabot hanggang 24.65% ang insidente ng TBLM sa taniman. Dahil sa paggamit ng biofungicide, naitala ang pagbaba ng insidente ng sakit hanggang 7.35% na lamang. Sinubukan din ito sa San Jose City, Nueva Ecija kung saan nakitang bumaba ang insidente ng sakit mula 43.12% hanggang 8.12% na lamang. Nakita rin ang pagbaba mula 42.35% hanggang 6.59% na lamang sa Cadanglaan, Sinait, Ilocos Sur.
Dahil sa dinebelop na biofungicide, naidokumento ang pagtaas ng ani ng kamatis na umaabot hanggang 2.6 kilo (kg) bawat halaman o 26 tonelada bawat ektarya (t/ha). Ang resultang ito ay mas mataas kaysa sa mga halamang ginamitan ng sintetikong ‘fungicide’ at mga halamang walang ginamit na ‘spray.’
Dahil sa resulta ng mga pagsubok, binigyang diin ng mga mananaliksik na ang nagawang biofungicide ay ang mas ‘sustainable’ at mas mabisang solusyon sa pagkontrol sa pagtaas ng insidente ng TBLM upang mapataas ang produksyon ng kamatis sa mga taniman.
Nagkaroon ng isang pagsasanay kasama ang 182 na magsasaka sa Regions 1, 2, at 3 upang mahikayat sila na gumamit ng nasabing biofungicide imbis na umasa sa mga sintetikong produkto. Upang mas mapalaganap ang paggamit nito laban sa fungus na nagdudulot ng sakit na TBLM, nagbigay ang proyekto ng dalawang ‘isolates’ sa 16 na Regional Crop Protection Centers.
Sa aspetong pinansyal, nakita na maaaring tumaas ang kita ng mga magsasaka hanggang P292,888.75 bawat ektarya. Ito ay mas mataas ng halos P100,000 sa kita ng magsasaka na gumagamit ng sintetikong fungicide.